Հարցը սովորաբար սխալ է ձևակերպվում՝ «ո՞րն է ավելի լավը»։ Ոչ մեկը։ Դրանք տարբեր գործիքներ են տարբեր խնդիրների համար, և ընտրությունը կախված է ոչ թե բյուջեից, այլ նրանից, թե ինչ եք ուզում, որ այցելուն անի։
Լենդինգը՝ մեկ գործողության համար
Լենդինգը մեկ էջ է, որը կառուցված է մեկ որոշման շուրջ․ թողնել հայտ, զանգահարել, գրանցվել, գնել մեկ ապրանք։ Ամեն բլոկ այնտեղ աշխատում է այդ նույն նպատակի համար։
Լենդինգը ճիշտ ընտրություն է, երբ․
- Ունեք մեկ ծառայություն կամ մեկ հստակ առաջարկ։
- Տրաֆիկը գալիս է գովազդից — Google Ads, Facebook, Instagram։
- Պետք է արագ ստուգել գաղափարը շուկայում։
- Անցկացնում եք ակցիա կամ միջոցառում՝ որոշակի ժամկետով։
Սահմանափակումները․ օրգանական որոնումից տրաֆիկ ստանալու հնարավորությունը նեղ է։ Մեկ էջը կարող է դիրքավորվել մեկ-երկու հարցման համար, ոչ թե տասի։ Եթե ձեր ծառայությունները հինգն են, լենդինգը դրանցից չորսը թաքցնում է։
Բազմաէջ կայքը՝ ընտրության համար
Բազմաէջ կայքն իմաստ ունի, երբ այցելուն պետք է համեմատի և ընտրի՝ ծառայություններ, ապրանքային խմբեր, գնային փաթեթներ։
Բազմաէջ կայքը ճիշտ ընտրություն է, երբ․
- Ունեք մի քանի ծառայություն, և յուրաքանչյուրն ունի իր լսարանը։
- Ուզում եք տրաֆիկ որոնումից — ամեն ծառայություն իր էջն է և իր հարցումը։
- Բիզնեսը երկար որոշման ցիկլ ունի, և մարդիկ վերադառնում են կայք մի քանի անգամ։
- Պլանավորում եք բլոգ, պորտֆոլիո կամ գիտելիքների բազա։
Սահմանափակումները․ ավելի թանկ է, ավելի երկար է պատրաստվում, և պահանջում է բովանդակություն՝ ամեն էջի համար։ Դատարկ էջերով կայքը վատ է աշխատում թե՛ մարդկանց, թե՛ որոնման համակարգերի համար։
SEO-ի տարբերությունը
Սա ամենակարևոր և ամենահաճախ անտեսված կետն է։ Google-ը դիրքավորում է էջեր, ոչ թե կայքեր։ Եթե ուզում եք հայտնվել «լենդինգ էջի պատրաստում», «առցանց խանութի պատրաստում» և «կորպորատիվ կայք» հարցումներով, ձեզ պետք է երեք էջ, ոչ թե մեկ էջի երեք բաժին։
Մեկ էջի վրա բոլոր հարցումները հավաքելու փորձն ավարտվում է նրանով, որ էջը լավ չի դիրքավորվում դրանցից ոչ մեկով։
Միջանկյալ տարբերակը
Գործնականում ամենահաճախ աշխատող սցենարը հետևյալն է․ սկսել ուժեղ գլխավոր էջից, որը լենդինգի պես կառուցված է, և աստիճանաբար ավելացնել ծառայությունների առանձին էջեր՝ ըստ առաջնահերթության։
Այսպես առաջին ամսվանից ունեք աշխատող գործիք գովազդի համար, իսկ օրգանական տրաֆիկը աճում է հետագա ամիսներին՝ առանց ամեն ինչ միանգամից վճարելու։
Ինչպես որոշել
Պատասխանեք երեք հարցի․
- Որտեղի՞ց է գալու տրաֆիկը առաջին վեց ամսում — գովազդի՞ց, թե՞ որոնումից։ Գովազդ → լենդինգ։ Որոնում → բազմաէջ։
- Քանի՞ տարբեր բան եք վաճառում։ Մեկ → լենդինգ։ Երեքից ավելի → բազմաէջ։
- Ո՞վ է գրելու տեքստերը։ Եթե պատասխան չկա, տասը էջ պլանավորելն անիմաստ է։
Եթե պատասխանները հակասում են միմյանց, սկսեք ավելի փոքրից։ Կայքն ավելացնել միշտ ավելի հեշտ է, քան պատրաստել այն, ինչ ոչ ոք չի լրացնում։
Երկու տարբերակի կողմնորոշիչ գինը կարող եք տեսնել գլխավոր էջի հաշվիչում։
